الثلاثاء، 22 يناير 2008

غزة فى قلب العرب



الغنوه دي مش لغزة وأريحا تبع الرئيس الفلسطيني أبو مزة يا بطة ودقن القطة .
الغنوة دي عشان آلاف الشهدا من كل جنس ولون .. بنات وشباب .. نسوان ورجاله ..
الغنوة دي عشان أطفال الحجارة اللي اصطنعوا القرف للصهاينة وفضلوا يرجموهم زي إبليس اللعين لحد ما دخل الرئيس أبو مزة عشان يحجز بين الطرفين وكأنه وسيط دولي نمساوي الجنسية ! الغنوة دي عشان أي إنسان بيحلم وحلمه حلال بتحرير الإنسان اللي حيحرر الأرض مهما طال الزمن .
الغنوه دي _ وقولوا عني مجنون _ عن غزة بنت فلسطين العربية ، وأنا وانتو والزمن طويل ..

احمد فؤاد نجم

غزة فى قلب العرب
ناح الحمام في الدوح
دمع البنفسج
سال
والورد
مال مجروح
من شكة الموال
قال الحمام .. ياليل
ويا عيني
ع اللي إنقال
مين يشتري الفيروز؟
غزه .. مع الدلال!

من فين يا شابه النسب
وبنت مين في الناس ؟
ومين في ناسك حسب
وعطاكي.. للنخاس!
بحرين عيونك أسى
ساقيين .. قلوب الناس
من فين يا شابه النسب
وبنت مين
في الناس !؟

قالت _ بلهجة عرب _
غزه .. في قلب العرب
حره .. وأهلي عرب
خالص
وبنت حلال

_ ألا أونا بنت العرب
للبيع
ومين قال كام ؟
سنيوره شبه القمر
مصنوعه .. للأحلام
يا حلال
على المقتدر
وع الغلابة حرام
دق الجرس بالعدد
واحد
ومين قال كام ؟
البنت من بدعها
ضحكت
ومن قلبها
عشقت
ومن وجدها
سمع الوجود زلزال

_ لايا عديم التنا
لاانت
ولا البايعين
سوق النخاسة جبر
والأهل بالملايين
أبويا باني الحرم
وامي من القدسين
ومصر
فيها الهوى
والعزوه
في الشرقين
حلفت بالمرحمه
والدم
والملحمة
والفارس اللي حمى
ما امشي
ورا الأندال
ما امشي
ورا الأندال