الجمعة، 22 فبراير، 2008

الطڤان



بيما إنو سي بالملون طڤني، يا وخياني هاني بش نمشي معاكم في الخط

قانون الطڤان:

1. وضع رابط الشخص اللي طڤك

2. وضع قانون اللعبة على مدونتك

3. توضح ستة نقاط غير مهمة على شخصك

4. لازمك تطڤ ستة مدونين

5. تعلمهم على مدوناتهم

÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷

1. طڤني سي بالملون

2. قانون الطڤان كتبتو و الحمد لله

3.

Ø فريقي المفضل سابقا في تونس المكشخة

Ø ما عادش نتبع و لا نحب الكورة

Ø ليامات هذي وليت نكره حاجة إسمها Analog CMOS Design

Ø غدوة خارج نتعشى في مطعم ياباني مع صحابي و ناكل سوشي

Ø ستة ولا سبعة سنين لتالي طڤتني عڤرب حاشاكم

4. بش نطڤ:

مواطن تونسي

برباش

دولاشة

الدغباجي

وليد

فاطمة

5. تو نعلمهم و ربي يبعد علينا و عليكم الطڤان


الجمعة، 15 فبراير، 2008

سان جوردي

السلام عليكم

البارح كان عيد الحب و حبيت نكتب حويجة على النهار هذايا اللي أنا ما نحتفلش بيه أما يعجبني برشة

ما نحتفلش بيه لزوز أسباب، لول أنا نرى إللي الحب ما يحتاجه نهار واحد في العام بش نحتفلو بيه خاتترني من النوع اللي يحتفل بالحب كل يوم، و السبب الثاني إنو اليوم المزيان هذا ولاّ مناسبة متع تجارة و استغلال و الفلوس فسدتلو المعنى الحقيقي متاعو.

كيما قلتلكم أنا كل يوم من أيّمات العام هو عيد حب عندي أمّا فمّا عيد حب نوعي شويا وليت نحتفل بيه عندي عامين ولاّ ثلاثة، حاصيلو ملّي وليت نسكن في كاتالونيا في إسبانيا.
العيد هذا إسمو سان جوردي أمّا مش كيما ممكن يدل إسمو، ماهوش عيد ديني بالرغم إلّي سي سان جوردي هذا هو قديس في الأصل. النهار هذايا عندو قصة؛ قالك قبل و في عصر مالعصور، كان فمّى تنين يهجم على العباد و ياكل فيهم، ياخي تفاهمو الناس بين بعضهم إنو يولّيو يعطوه كل يوم علّوش ياكلو و هكّاكه يرتاحو من شرّو. لين جاء النهار الي وفاو لعلالش مالبلاد ولاّو تفاهمو بش يعملو قرعة و كل يوم يعطوه صبية ياكلها. القرعة الأولى طاحت في راس الأميرة. كيف جا التنين بش ياكلها جا البطل سي سان جوردي و قتل التنين و منعها. في البلاصة اللّي مات فيها التنين طلعت وردة حمرة.
الأميرة بش تشكرو هداتلو كتاب. الحكاية هذي صارت نهار 23 أفريل و من وقتها و هوما يحتفلو بيه كعيد حب، المرأة تهدي للراجل كتاب و الراجل يهدي للمرأة وردة.
مالحجات اللي تعجبني في النهار هذا زادة إنو ماهوش عيد حب متع كوبلوات بركة أما مع الناس الكل اللّي تحبهم، تنجم تهدي وردة لحبيبتك، لأمك، لأختك، لصديقاتك.... وهمّ زادة يهديولك كتاب. على فكرة النهار هذايا يحتفلو بيه في كاتالونيا بركة و مش في بقية إسبانيا.

تنجمو تلقاو معلومات أكثر عليه في ويكيبديا. حاصيلو خوكم شاخ بالكتب عمناول و وليت عمناول و بيناتنا لولاد ديما وردة أرخص من كتاب ;ـ)

نهاركم زين و نشاء الله ديما تحبّو و تتحبو

الخميس، 14 فبراير، 2008

قولي أحبك






قولي "أحُبكَ" كي تزيدَ وسامتي
فبغيرِ حبّكِ لا أكـونُ جميـلا

قولي "أحبكَ" كي تصيرَ أصابعي
ذهباً... وتصبحَ جبهتي قنـديلا

قـولي "أحبكَ" كي يتمَّ تحـولي
فأصيرُ قمحاً... أو أصيرُ نخيـلا

الآنَ قوليهـا... ولا تتـردّدي
بعضُ الهوى لا يقبلُ التأجيـلا

قولي "أحبكَ" كي تزيدَ قداستي
ويصيـرَ شعري في الهوى إنجيلا

سأغيّرُ التقويمَ لـو أحببتـني
أمحو فصولاً أو أضيفُ فصولا

وسينتهي العصرُ القديمُ على يدي
وأقيـمُ مملكـةَ النسـاءِ بديـلا

قولي "أحبكَ" كي تصيرَ قصائدي
مـائيـةً... وكتابتي تنـزيـلا

مـلكٌ أنا.. لو تصبحينَ حبيبتي
أغزو الشموسَ مراكباً وخيولا

لا تخجلي مني فهذه فرصتي
لأكون ربا، أو أكون رسولا



نزار القباني